NIVELI V I KSHK
Bashkëpunoni me Arsimin Dual Pas të Mesmes – investoni në profesionistët e ardhshëm! Arsimi Dual Pas të Mesmes, Niveli V i KSHK, është një model bashkëpunimi mes institucioneve të arsimit profesional dhe bizneseve, ku mësimi profesional kombinohet me përvojën reale në vendin e punës. Synohet përgatitja e profesionistëve me njohuri, shprehi dhe kompetenca për t’u punësuar në veprimtari të lidhura me menaxhimin e strukturave akomoduese në industrinë e mikpritjes.
Si funksionon Arsimi Dual Pas të Mesmes
01
Niveli V i KSHK
Program pas arsimit të mesëm, që përgatit profesionistë me njohuri, shprehi dhe kompetenca për menaxhimin e strukturave akomoduese në industrinë e mikpritjes.
02
Orari javor
3 ditë në javë në biznes, ku realizohet praktika profesionale në procese reale pune, dhe 2 ditë në javë në shkollë, ku zhvillohen modulet dhe lëndët profesionale.
03
Ndërthurja mësim–punë
Mësimi në shkollë dhe përvoja në biznes ndërthuren për të zhvilluar kompetenca profesionale të drejtpërdrejta dhe të zbatueshme në vendin e punës.
04
Instruktori i biznesit
Biznesi cakton një instruktor me përvojë, i cili në bashkëpunim me mësuesin mbështet, motivon, mbikëqyr dhe vlerëson individët gjatë praktikës.
05
Sektori i mikpritjes
Programi lidh arsimin profesional me nevojat e tregut të punës dhe përgatit profesionistë për hotele, resorte, agroturizme, bujtina dhe struktura të tjera të mikpritjes.
06
Certifikimi
Pas përfundimit me sukses të kualifikimit dhe provimeve, individët pajisen me Certifikatën Profesionale të Nivelit V të KSHK-së dhe Suplementin përkatës, të njohura në territorin e Republikës së Shqipërisë.
Pse të bëheni biznes që ofron Arsim Dual Pas të Mesmes?
- Rrisni potencialin e biznesit duke aftësuar punonjës të ardhshëm sipas nevojave tuaja.
- Përfitoni staf të motivuar dhe me njohuri të avancuara profesionale.
- Ndihmoni zhvillimin e komunitetit dhe ekonomisë lokale.
- Mundësi për të marrë mbështetje dhe bashkëpunim nga agjencitë shtetërore.
Detyrat tuaja si biznes
- Nënshkruani marrëveshjen e bashkëpunimit me institucionin e arsimit profesional dhe dokumentacionin për praktikën.
- Siguroni një vend pune të përshtatshëm dhe të sigurt.
- Caktoni një instruktor biznesi me përvojë për mbështetjen, udhëheqjen dhe vlerësimin gjatë praktikës.
- Mundësoni angazhimin në detyra dhe procese reale të profesionit.
- Bashkëpunoni me mësuesin dhe institucionin arsimor për zbatimin, monitorimin dhe vlerësimin e praktikës.
- Respektoni kërkesat për sigurinë dhe shëndetin në punë.
Kush mund të jetë biznes që ofron Arsimin Dual Pas të Mesmes?
- Bizneset private me 3+ vite në treg dhe të paktën 2 punonjës të regjistruar.
- Njësitë publike që plotësojnë kriteret ligjore.
- Infrastrukturë dhe staf të kualifikuar për mentorim.
Për kë është Arsimi Dual Pas të Mesmes?
- Për të rinj dhe të reja që kanë përfunduar Nivelin IV të KSHK-së dhe dëshirojnë të marrin njohuri të reja ose të thellojnë aftësitë e tyre profesionale në sektorin e hotelerisë dhe mikpritjes.
- Për individë që kanë përfunduar kualifikimin profesional „Hoteleri-Turizëm“, Niveli IV i KSHK-së.
- Për individë me një kualifikim tjetër të Nivelit IV të KSHK-së dhe të paktën 1 vit përvojë pune të vërtetuar në fushën e mikpritjes.
Në përfundim, individët mund të punojnë si menaxherë të mesëm në hotele, resorte, agroturizme, bujtina dhe struktura të tjera të mikpritjes, si dhe të zhvillojnë sipërmarrjen e tyre në këtë sektor.
Përfitimet për biznesin tuaj
- Fuqi punëtore e trajnuar sipas kërkesave të sektorit.
- Mundësi për të përzgjedhur dhe zhvilluar staf potencial për të ardhmen.
- Profesionistë me njohuri profesionale dhe përvojë reale në biznes.
- Mundësi për të ndikuar në zhvillimin e aftësive që kërkon tregu i punës.
- Bashkëpunim më i ngushtë me institucionet e arsimit profesional.
Si filloni?
01
Kontaktoni shkollën tonë, që ofron programin Arsim Dual Pas të Mesmes – Niveli V i KSHK.
02
Shprehni interesin për të bashkëpunuar dhe për të ofruar praktikë profesionale në biznesin tuaj.
03
Bashkëpunoni me shkollën për përcaktimin e numrit të individëve, periudhës dhe programit të praktikës.
04
Përcaktoni instruktorin e biznesit dhe siguroni kushtet e nevojshme për realizimin e praktikës.
05
Bashkëpunoni me shkollën për mbarëvajtjen, monitorimin dhe vlerësimin e individëve gjatë praktikës.
Bashkëpunoni me ne
Për detaje më të hollësishme rreth Arsimit Dual Pas të Mesmes, na kontaktoni — stafi ynë është në dispozicionin tuaj për çdo pyetje.